Profesori dhe njohësi i çështjeve politike, Sulejman Mehazi, pohon se çështjen e Asociacionit kryeministrit të Kosovës, Albin Kurtit, ia lanë në dorë qeveritë e mëhershme të Isa Mustafës dhe Hashim Thaçit.
E kjo çështje, sipas tij, kryeministrit Kurti po i sjellë shumë probleme.
“Pikësëpari, këtë brengë të madhe politike e shtetërore të asociacioneve serbe kryeministrit të Kosovës Kurtit ia kanë lënë qeveritë e mëparshme të papërgjegjshme PDK e LDK në krye me Isa Mustafën e Hashim Thaçin, të cilët pa hezituar e analizuar nënshkruan të keqen e asociacioneve serbe që qeverisë së Albin Kurtit është duke e dhunuar e dhuruar shumë probleme serioze që këtë mall e pasuri tokësore kushtetuese të nënshkruar e të humbur nga Mustafa ta kthejë në pronë kushtetuese të Kosovës”, thotë Mehazi për gazetën “Bota sot”.
Profesori shton se, ky presion për themelimin e Asociacionit po vjen për shkak të Qeverive paraprake.
“Pra, i gjithë presioni i BE-së për themelimin e asociacioneve serbe vjen për shkak partive paraprake të korruptuara të cilët sakrifikuan e cënuan kufijtë kushtetuese të Kosovës për t'u pasuruar vetë, njësoj sikurse prindërit e këqinj që kanë ngarkuar pasardhësit e tyre me hipoteka pasurore”, potencon ai.
Mehazi tutje shprehet se, problemi i asociacioneve hipotetike i nënshkruar nga Pronto është rrugë politike djallëzore jo vetëm për vetë kryeministrin e Kosovës, por edhe për BE-në dhe SHBA-në.
“Hipoteka e asociacioneve e Isa Mustafës ka ngulfatur aq shumë qeverinë e Kurtit sa që ka tre rrugë, ose të pajtohet e dorëzohet me asociacionet ekzekutive e operative serbe për një republikë 4% serbe në Kosovë, ose të ndalojë procesin e mëtutjeshëm të dialogut me BE-në e Serbinë, ose Kurti të jep dorëheqje dhe gjatë zgjedhjeve të ardhshme parlamentaret me votat e qytetarëve të rizgjedhin përsëri Albin Kurtin në krye të qeverisë për të pasur forcë argumentuese të fuqishme para BE-së e Serbisë me rastin e asociacioneve serb”, thekson ai.
Profesori tutje shton se, ka shpresa se shtetet perëndimore do pajtohen me propozimin e kryeministri Kurtit për llojin e asociacioneve të pakicave serbe në Kroaci, përkundrazi nuk duhet lejuar e vepruar sipas dëshirave të asociacioneve serbe të Vuçiqit.
“Po habitemi edhe me BE-në se si është e mundur të përkrahin Serbinë e luftrave që është me Rusinë e nuk përkrahet Kosova e paqës orientuar drejt BE-së e SHBA-së?!!”, përfundon profesori Sulejman Mehazi.