Ditë më parë, përfaqësuesi i kristian-demokratëve dhe ish-raportuesi për Ballkanin Perëndimor i grupit parlamentar të Demokristianëve në Bundestag, Peter Beyer, shprehu frikën se nëse Trump vjen sërish në pushtet, çështja e shkëmbimit të territoreve mes Kosovës dhe Serbisë, të cilën BE dhe Gjermania e refuzojnë si një opsion jashtëzakonisht të rrezikshëm, mund të shtrohet sërish për diskutim.
E në lidhje me rikthimin e mundshëm të Trump në pushtet dhe ndikimin e tij në Kosovë, më saktësisht në Ballkan, në një bashkëbisedim me “Bota sot” foli eksperti austriak, Gunther Fehlinger.
Si fillim, ai u shpreh se Biden është një president shumë më i mirë se Trump, dhe një rikthimi i këtij të fundit në pushtet, nuk do sillte asgjë të mirë për Kosovën.
“Pas performancës së dobët të Presidentit Biden kundër “luftëtarit në kafaz”, Donald Trump në debatin televiziv, ky i fundit duket përsëri në epërsi dhe ne duhet të diskutojmë pasojat e një fitoreje të tij në nëntor 2024.
Ndërsa edhe gjysmë i fjetur, Biden është një president shumë më i mirë se Trump, dhe duke pasur parasysh 7 milionë votat më shumë nga viti 2020, gjasat për një fitore të Bidenit janë më të larta, por ai ka më shumë probleme me moshën, sesa Trumpi, 4 vjet më i ri.
Kështu që, çfarë do të thotë rikthimi i Trumpit për Kosovën dhe shqiptarët?
Asgjë e mirë.
Por, fatkeqësisht, vazhdimi i zbutjes së kujdesshme të Bidenit ndaj Rusisë dhe Serbisë, nuk është aspak i përsosur për Kosovën.
Jugonostalgjia, e përzier me ndërgjegjen e keqe për ndërhyrjen e vitit 1999 dhe një doktrinë e re e menaxhimit të përshkallëzimit nga Borrel dhe Sullivan, na kanë çuar në këtë luftë të gjatë në Ukrainë dhe në qorrsokakun e të ashtuquajturit dialog mes Serbi dhe Kosovë, që është bërë një instrument shantazhi ndaj Kosovës”, shpjegoi eksperti austriak.
Gjithashtu, Fehlinger tha se duhet të përballemi me shtetin serb, nacionalizmi rus dhe ideologjitë e tyre të rrezikshme.
Ai shtoi se duhet ndryshim edhe nga ana e SHBA-së, ngjashëm si ato në BE, ku edhe pritet të zëvendësohet Borrell me Kallas.
“Ne kemi nevojë për një qasje të re, pavarësisht se kush do të jetë Presidenti i SHBA-së në vitin 2025
Ne duhet të përballemi me Serbinë dhe nacionalizmin agresiv rus dhe të mposhtim ideologji të tilla të rrezikshme në fushën e betejës.
Në BE një linjë shumë më e ashpër ka fituar kundër miqve të butë të Jugosllavisë që drejtojnë politikën në 5 vitet e fundit.
Ne kemi nevojë për një zhvendosje të ngjashme si ajo nga Borrel në Kallas, edhe në SHBA gjithashtu.
Ne kemi nevojë për Bidenin e viteve 1990 përsëri!
Shpresojmë se tronditja e katastrofës televizive do të rezultojë në një ndryshim të madh politikash të kampit të Bidenit, i cili tani më shumë se kurrë ka nevojë për një fitore në fushën e betejës në Ukrainë, nëse duan të fitojnë në nëntor”, nënvizoi ai.
Ndër të tjera, eksperti austriak, parashikoi se në rast se nuk e fiton Ukraina luftën, atëherë Bideni nuk do e marrë mandatin e dytë, ku kësisoj do rikthehet Trump në pushtet.
“Nëse nuk ka fitore në Ukrainë, nuk do të ketë as mandat të dytë për Biden. Tani për herë të parë, kampi i Bidenit, duhet të ketë një interes për të përshkallëzuar luftën, në mënyrë që të zvogëlojë ‘problemet’ me çështjet e moshës dhe të tregojë se Biden është një hero lufte dhe një fitues i denjë për mandatin e dytë
Nëse Biden vazhdon të zvarritet dhe të rrëshqasë në mënyrë të pavendosur në harresë, ne do të përballemi me një mandat të dytë të Trump.
Dhe, ne i mbijetuam qeverisjes 2016-2020 dhe në të vërtetë gjatë asaj presidence, Mali i Zi dhe Maqedonia e Veriut iu bashkuan NATO-s dhe Kosova mori të vetmen njohje të re në një dekadë, Izraelin”, përfundoi Gunther Fehlinger për “Bota sot”.
