Shteti serb edhe njëherë konfirmoi se nuk do ta njoh Marrëveshjen bazë me Kosovën. Kështu, Kryeministri i Serbisë, Milosh Vuçeviq, gjatë një seance të kësaj jave të parlamentit serb, ka thënë se vendi i tij nuk e ka pranuar planin franko-gjerman.
“Edhe një herë, do ta them mjaftë qartë, kjo po regjistrohet me zë por edhe po transkriptohet: Republika e Serbisë nuk e ka pranuar marrëveshjen franko-gjermane. Edhe një herë, ne nuk e kemi pranuar planin franko-gjerman”, ishte shprehur Vuçeviq para deputetëve të parlamentit serb.
Kjo deklaratë e kreu te qeverisë serbe duhet të ‘bie në vesh’ të BE-së për të marrë ndonjë vendim ndaj shtetit serb lidhur me dialogun dhe normalizimin me Kosovën.
Pati reagime ndaj zyrtarët e Kosovës, megjithatë një vendim nga BE-ja nuk u bë i ditur ende.
Lidhur me këtë ‘Bota sot’ ka pyetur deputetin gjerman Knut Abraham, nëse BE-ja duhet të dënoj Serbinë apo cili duhet të jetë dënimi ndaj saj.
Ai thotë dialogu i normalizimit de fakto ka vdekuar, ndërsa pyetet nëse duhet të sanksionohet Serbia, sanksionet ndaj Kosovës nuk janë hequr deri më tani.
“Është joreale që Serbia të sanksionohet nga BE-ja, për fat të keq, as sanksionet ndaj Kosovës nuk janë hequr deri më tani – gjë që është e papranueshme. Duhet të pranojmë se dialogu i normalizimit de facto ka vdekur. Përderisa Serbia nuk ka interes për normalizim, çdo dialog bëhet i pakuptimtë”, vlerëson ai.
Deputeti i Bundestagut gjerman thekson se kjo gjendje e pasqyron një krizë të thellë në politikën e BE-së që mund të rrisë rrezikun e një konflikti rajonal.
“Megjithatë, kjo pasqyron një krizë më të thellë në politikën e BE-së ndaj rajonit. Pa një politikë të besueshme zgjerimi, BE-ja do të vazhdojë të humbasë ndikimin, gjë që do të rrisë rrezikun e një konflikti rajonal”, vlerëson ai.
Ai vlerëson se kjo duhet të ndryshohet dhe ka një mënyrë, që do të ishte një fitore e favorshme për të gjithë.
“Duke u ofruar të gjashtë shteteve të Ballkanit Perëndimor që t'i bashkohen tregut të vetëm si një hap i përkohshëm deri në vitin 2030, mund të rivendoset një kornizë e besueshme për paqen dhe stabilitetin. Çdo vend që përmbush kushtet së pari, do të shpërblehej me akses në tregun e vetëm, duke përfshirë lëvizjen e lirë të njerëzve, mallrave, shërbimeve dhe kapitalit. Kjo do të rivendoste nxitjen për politikanët në rajon për të zbatuar reformat e nevojshme që do t'u ofronin qytetarëve të tyre një perspektivë të vërtetë evropiane deri në vitin 2030”, thotë deputeti gjerman për ‘Bota sot’.
