Në një adresim para kombit, më 13 shtator, Vuçiq ka thënë se Serbia beson që përmbushja e kërkesave përbën “parakusht të domosdoshëm për një përparim domethënës” në procesin e dialogut mes Kosovës dhe Serbisë.
"Kërkojmë të kthehemi te gjithçka që është arritur dhe përparuar në procesin e dialogut".
Ai ka paralajmëruar se Beogradi do të nisë një “fushatë diplomatike globale”, në mënyrë që të plotësohen këto kërkesa.
Në këtë adresim Vuçiq parashtroi shtatë kërkesa, ndër to edhe formimi i Asociacionit.
E në lidhje me këto kërkesa dhe mundësinë e realizimit të tyre, për “Bota sot”, ka folur avokati shqiptar Spartak Ngjela.
Ai thotë se kërkesat e Vuçiqit janë marrëzira politike dhe se mbrojtja që Kosova ka nga SHBA është shumë e fortë, për këtë arsyje kot lodhet Vuçiqi.
“Është thjesht marrëzira politike e ekstremit Milosheviçian në Serbi.
Asgjë nuk bëjnë dot.
Kosova është marre me luftë, dhe pavarësia e saj është në nivel të lartë të mbrojtjes amerikane.
Bota shqiptare në Gadishullin Ilirik sot është brenda interesit të madh amerikan.
Te kjo borë shqiptare është përqendruar edhe interesi i të dyja superfuqive: Edhe USA edhe Rusia e kanë në trajtimin e tyre politik Shqipërinë dhe Kosovën
Por politika amerikane është shumë më e fortë në të dy shtetet shqiptare: Edhe në Kosovë, edhe në Shqipëri.
Në fakt kjo është Thembra e Akilit në politikën e sotme perëndimore për botën shqiptare në Gadishullin Ilirik.
Dhe ky është edhe fati i madh historik i Shqipërisë dhe Kosovës.
Kot lodhet Vuçiq”, u shpreh ai.
Më tej,avokati jep një shpjegim për rëndësinë që veri i Kosovës ka.
Duke vazhduar Ngjela thotë që bashkimi kombëtar shqiptar në Gadishullin Ilirik është interes amerikan dhe do të ndodhë.
“E dini juve se çfarë është veriu i Kosovës?
Është e ardhmja e shqiptarisë sepse burimet nëntokësore të Veriut të Kosovës jenë magjia e pritshme e zhvillimit ekonomik kombëtar të të gjithë shqiptarisë...
Në këtë rajon si rezerva minerare është e ardhmja e botës shqiptare në Evropë dhe në rrafsh botëror . prandaj kot lodhen edhe Beogradi edhe Moska.
Kurse Albin Kurti duhet ta ketë mirë parasysh që shqiptaria sot është e pathyeshme, dhe nacionalizmat arkaikë të tipit naziskin nuk kanë me vend në botën moderne, ku sot bën pjesë edhe Shqipëria edhe Kosova.
Interesi amerikan për shqiptarinë në Gadishullin Ilirik është i ndërthurur realisht brenda binomit kombëtar Shqipëri Kosovë.
Me gjithë pengesat që po sjell Albin Kurti, asgjë nuk mund të ndodhë në ecurinë e bashkimit kombëtar shqiptar në Gadishullin tonë, që po mbë shtetet nga Shtetet e Bashkuara të Amerikës.
Veriu i Kosovës me Mitrovicën e Trepçen, keni për ta parë që do të jetë simboli i zhvillimit të botës shqiptare, si një çështje që shumë shpejt do të jetë epiqendra e zhvillimit kombëtar të shqiptarisë”, përfundoi avokati Ngjela për “Bota sot”.
