Situata mes Kosovës dhe Serbisë po vazhdon të jetë e ndërlikuar.
Serbia është ajo e cila nuk është e gatshme për të biseduar e aq më pak të zbatoj marrëveshjet që kanë nënshkruar me Kosovën.
E për të mos mjaftuar, Vuçiq edhe parashtroi disa kërkesa për Kosovën për të vazhduar dialogun.
Natyrisht që këto kërkesa nuk u mirëpriten nga Kosova.
E të dëmshme dhe aspak të duhura i pa edhe doktori i marrëdhënieve ndërkombëtare, Shqiprim Pula.
Ai për “Bota sot”, u shpreh se Serbia është një fiqnj problematic e agresiv në rajon e sidomos për Kosovën.
“Ne kemi një fqinj problematik e agresiv në rajon, e veçanërisht ndaj nesh Serbia ka treguar hapur jo vetëm ndërhyrje në punët tona të brendshme por edhe pretendime territoriale, edhe përkundër procesit të dialogut, i cili, mëtonte të arrihej 'normalizim marrëdhëniesh’”, u shpreh ai.
Më tej, Pula shton që kërkesa e Vuçiqit që u bënë nja javë para përvjetorit të agresionit në Banjskë, është një goditje si për shtetin e Kosovës ashtu edhe për procesin e dialogut.
“Çuditërisht, veç një javë pa u bë përvjetori i parë nga agresioni në Banjskë të Zveçanit, presidenti serb Vuçiq, para mediave, bëri të ditura pesë (5) pika politike si adresim tek shtetet e ndryshme nëpër botë dhe shtatë (7) kërkesa për Prishtinën politike, të cilat, veç zhvillime pozitive nuk do të sjellin në të ardhmen.
Ky veprim i radhës, nga Vuçiq, sërish është goditje si për shtetin e Kosovës ashtu dhe për procesin e dialogut”, përfunoi Pula për “Bota sot”.
Kujtojmë shtatë kërkesat e Serbisë
Vuçiq ka kërkuar:
- shpalljen dhe mbajtjen e "zgjedhjeve lokale të lira dhe demokratike" në veriun e Kosovës, me pjesëmarrjen e misionit të Organizatës për Siguri dhe Bashkëpunim në Evropë (OSBE) dhe me mbikëqyrjen e Bashkimit Evropian,
- kthimin e serbëve në Drejtorinë Rajonale të Policisë së Kosovës për veriun, dhe kthimin e gjyqtarëve dhe prokurorëve serbë në funksionet e tyre,
- tërheqjen e forcave speciale të Policisë së Kosovës nga "bazat dhe pikat e kontrollit të ndërtuara në mënyrë të paligjshme" në veriun e Kosovës,
- tërheqjen e policisë nga të gjitha institucionet "të cilat nga viti 1999 deri në mbylljen e paligjshme në vitin 2024 ofronin shërbime vitale publike dhe administrative për qytetarët".
- formimin e Asociacionit të komunave me shumicë serbe,
- zbatimin e menjëhershëm të “garancive të Bashkimit Evropian dhe Shteteve të Bashkuara nga 28 dhjetori i vitit 2022, dhe lirimin e menjëhershëm të të gjithë të burgosurve politikë", të arrestuar nga Policia e Kosovës, dhe
- kryerjen e pagesave me shërbimeve postare me valutën serbë, dinar.
