Veprimtari shqiptar nga SHBA, Ramazan Bekteshi në një bashkëbisedim me “Bota sot” foli në lidhje me fushatat zgjedhore të partive politike, si dhe tregoi pritshmërit për zgjedhjet e 9 shkurtit.
Si fillim, ai kishte disa kritika për mënyrën e të bërit fushatë nga të gjitha palët.
Në këtë pikë, theksoi fokusin e opozitës për ta marrë pushtetin.
“Nga larg i shohim në kufijtë e normales, me retorikë gjithfarë, shpesh kakofonike nga të gjitha palët. Opozita fort prezente, e koncentruar fort se si të marri pushtetin. Ata, aleatë kryesor i kanë edhe mediat, analistët dhe disa OJQ. Janë vërejtur disa parti më shumë e disa më pak duke u marrë suksesshëm edhe me logjistikën e transportit me autobusë, duke ekspozuar një numër të njëjtë njerëzish kudo që shfaqen dhe kjo mund t’i kushtoj ndonjërës parti në ditën e zgjedhjeve. Urojmë që këto zgjedhje të shpallen si më të pranuarat në rajon”, deklaroi veprimtari.
Më tej, Bekteshi komentoi pritmshërit që kanë partitë politike, derisa shtoi se dihet fituesi i këtyre zgjedhjeve.
“Është joreale që të gjitha partitë të lavdërohen se do të fitojnë, sepse sipas sondazheve fituesi dihet, është VV-ja. Çështja është se a është ajo në gjendje të fitojë mbi 50% për të qeveris vetëm edhe pse unë, personalisht, nuk e favorizoj këtë qasje, e as të gjitha së bashku me opozitën”.
Ndër të tjera, veprimtari nga SHBA parashikoi radhitjen e subjekteve politike të 9 shkurtit, ku tha se nuk pret ndonjë koalicion befasues.
“VV-Guxo, 2. PDK, 3. LDK, 4. AAK-NISMA
Nuk pritet ndonjë koalicion befasues edhe pse do të dëshiroja ta shihja njërën nga dy partitë opozitare me fituesen, VV-në!”, përfundoi Ramazan Bekteshi për “Bota sot”.
