Në Serbi po vazhdojnë të mbahen protestat.
Bashkimi Evropian nuk është deklaruar asnjëherë nëse i mbështet ose jo kërkesat e studentëve në Serbi, të cilët, për gati tre muaj, protestojnë duke kërkuar përgjegjësi për vdekjen e 15 personave nga shembja e një strehe në Stacionin Hekurudhor të Novi Sadit.
Analisti Driton Tali, në një prononcim për “Bota sot”, thotë se Serbia është gati të eskalojë e tëra, po ashtu edhe presidenti i saj e ka humb gjakftohtësinë. Sidomos këto dy-tri ditë e fundit Vuçiq edhe busullën e ka humbë tërësisht.
“Situata në Serbi është në eskalim e sipër. Vuçiçi këto javët e fundit e ka humb gjakftohtësinë.
Deklaratat e tij shpesh herë ishin "për gjynah". Bile disa herë vokabulari i tij ishte i nivelit të rrugaçëve. Për më tepër, këto dy-tri ditët e fundi edhe busullën e ka humbë tërësisht. Sillet si "pula pa kry". Me veprimet e tij e ka sjell Serbinë në një vend të rrezikshmërisë së lartë për paqen në Evropë - menjëherë pas Ukrainës”, thotë ai.
Për heshtjen e BE-së, Tali thotë se ata janë duke e përcjell me vëmendje situatën në Serbi.
“Nga Brukseli, institucionet e BE sigurisht se janë duke e përcjell me vëmendje të shtuar. Një gjë të tillë e pohoi dje, edhe zëdhënësi ekzekutiv i BE-së për Zgjerimin, Guillaume Mercier, duke deklaruar për mediet se: “Ne jemi të shqetësuar për incidentet kundër protestuesve, për të cilat presim hetime të shpejta nga autoritetet serbe” duke vazhduar me “rikujtojmë se sipas ligjit të BE-së, autoritetet duhet t'i mbrojnë pjesëmarrësit në demonstrata nga grupet e armatosura ose të dhunshme".
Sigurisht se institucionet e BE-së janë të kujdesshme në veprimet dhe deklaratat e tyre sepse tash për tash gjeopolitika, me theks të veçantë kjo evropiania, është duke kaluar nëpër një fazë shumë komplekse andaj kujdesi është i shtuar që të mos bëhen hapa të cilat mund ta përkeqësojnë situatën.
Sidoqoftë, unë jam ka e shoh si fundi i fillimit të një periudhe të favorshme për Kosovën dhe rajonin, dhe shpresoj se institucionet tona shtetërore do të dijnë ta kapitalizojnë në plotni për intereset tona”, përfundon ai.
