UEFA ka zyrtarizuar organizimin e Kampionatit Evropian U-21 të vitit 2027 në Shqipëri dhe Serbi.
Ky bashkëpunim mes tyre nuk është se u prit mirë nga akterë të ndryshëm, duke ditur si janë punët mes Kosovës dhe Serbisë. Armnd Duka, kryetar i FSHF, ka thënë se “Ky është një vendim shumë i rëndësishëm nga UEFA, sepse Kampionati Europian U-21 i vitit 2027 do të jetë më shumë sesa një turne futbolli. Ai do të shërbejë si një katalizator për të thyer barriera, për të forcuar mirëkuptimin e ndërsjellë dhe për të krijuar një të ardhme më pozitive për popujt e Shqipërisë dhe Serbisë. Ky turne do të tregojë gjithashtu se çfarë mund të arrihet kur njerëzit bashkohen rreth një objektivi të përbashkët, të frymëzuar nga fuqia e futbollit. Ky do të jetë eventi më i madh sportiv në historinë e Shqipërisë.
Prandaj, ai na jep mundësinë që, me mbështetjen e UEFA-s, të modernizojmë stadiumet dhe infrastrukturën e futbollit në të gjithë vendin. Gjithashtu, ky organizim do të krijojë një trashëgimi të qëndrueshme për të frymëzuar brezat e ardhshëm të lojtarëve, vullnetarëve dhe tifozëve në të dyja vendet”.
Derisa, tifo-grupi zyrtar i Kombëtares së Shqipërisë në futboll, "Tifozat Kuq e Zi" ka reaguar ashpër pas këtij vendimi. Në një postim në rrjetet sociale, ky tifo-grup ka shprehur kundërshtimin e tij të fortë ndaj këtij vendim.
“Do t’iu mallkojë historia dhe gjaku i mijëra dëshmorëve të rënë për flamur”.
Ky reagim ka ardhur pas njoftimit të UEFA-s që konfirmoi organizimin e përbashkët të këtij kompeticioni nga dy vendet, Shqipëria dhe Serbia.
Opinionisti shqiptar, Xhevat Mustafa në një prononcim për “Bota sot”, ka thënë se përgjigja më e mirë për këtë çështje do të ishte bojkotimi masiv i këtij kampionati.
“Sikur të kishte në këtë vend, pra në Shqipëri, më shumë shqiptarë se sa enveristo- edramistë, përgjigja më e mirë për Edi Ramën- dhe Armand Dukën do të ishte bojkotimi masiv i këtij kampionati, së pari nga tifozët kuq e zi, duke i lënë stadiumet bosh, edhe sikur të ishin biletat falas!?”, thotë ai për “Bota sot”.
Kurse, gazetari sportiv Dritan Shakohoxha, ka kujtuar vitin 2014 kur në fushë u përleshën serbët me shqiptarë.
Ai ka deklaruar se, serbët ishin përgatitur për luftë, jo për ndeshjen.
“Unë kam qenë atje. Njerëzit nuk e kuptojnë atë që ne ndjejmë në stadium. Pavarësisht gjithçkaje, i futur brenda profesionit tënd. Nuk kam parë ndonjëherë ndonjë gjë si ajo. Ne nuk e dinim se ku shkonte kafshëria e tyre. Ata e dinin, por ne nuk e dinim. Kur kam parë turmat e policëve, ishin si ninxha, zbrit e zbrit. Kam thënë një batutë, kjo më duket si republikat ruse, që i mbushnin stadiumet me policë, se nuk u shkon njeri në stadium. Një nga motivet që ne mezi i morën 3 pikët në KAS, ne nuk kishim eksperiencë në manovrimin e këtyre situatave. Ata zbritën nga tribunat, goditën të gjithë futbollistët. Ata nuk e kishin me ne, kjo nuk ndodhi për shkak të dronit. Aq shumë mori doza agresiviteti, ishte shumë zhurmë. Realisht, këta njerëz kishin ardhur për luftë, jo për ndeshjen”, theksoi ai.
