Një shpërthim tritoli ka tronditur Shkodrën në orët e para të mëngjesit të sotëm.
Mësohet se lënda plasëse ishte vendosur në banesën e shefit të Seksionit për Hetimin e Krimeve, Pëllumb Shpati. Nga shpërthimi ka pasur vetëm dëme materiale, ku ka pasur dëmtime të lehta në banesë por edhe në automjetin e Shpatit.
Shkak për lëndën plasëse dyshohet paraprakisht se është detyra e tij, ndërsa policia ka nisur hetimet për zbardhjen e plotë.
Njoftimi i policisë:
Rreth orës 03:50, në lagjen Dobraç, ka shpërthyer një sasi lënde plasëse, përpara banesës së shtetasit P. Sh., me detyrë shef i Seksionit për Hetimin e Krimeve, në Komisariatin e Policisë Shkodër.
Si pasojë janë shkaktuar dëmtime të lehta në banesën e tij, si dhe është dëmtuar automjeti i tij.
Grupi i posaçëm hetimor i ngritur për zbardhjen e kësaj ngjarjeje, nga veprimet e para hetimore, ka siguruar prova që do të çojnë në identifikimin dhe kapjen e autorit/ëve.
Nën drejtimin e Prokurorisë pranë Gjykatës së Rrethit Gjyqësor Shkodër, vijon puna për zbardhjen e rrethanave të kësaj ngjarjeje.