Greqia zyrtarizoi zgjerimin e ujërave territoriale në veri të Detit Jon pranë Shqipërisë nga 6 në 12 milje.
Për ish drejtuesin e administratës detare shqiptare Gazmir Tahiri janë shqetësuese dhe deklaratat e kryeministrit grek.
Gazmir Tahiri shprehet se kjo deklaratë nënkupton që zgjerime të tjera na presin dhe teorizimi që së fundmi i është bërë nga mediat greke për shqyrtimin e Sazanit është një interpretim katastrofik për realitetin shqiptar.
Gazmir Tahiri: Menjëherë pas vendimit kryeministri grek Mitsotakis ka dalë dhe ka deklaruar se ky është vetëm fillimi. Pra zgjerime të tjera na presim. Ajo çka është më shqetësuese në deklaratën e Kryeministrit Mitsotakis, po shkohet dhe është përmendur dhe në disa media greke, shqyrtimi i një opsioni të një arkipelagu ishujsh. Që fillojnë nga poshtë dhe përfundojnë deri në Sazan dhe po teorizohet që dhe Sazani është pjesë e këtij arkipelagu,çka do ishte realisht një interpretim katastrofik për realitetin shqiptar. Këto janë kambana serioze alarmi të cilat bëjnë që të lëvizim nëse kemi qenë në pasivitet. Dhe unë nuk e kuptoj se ç’është ky pasivitet i autoriteteve shqiptare për arsye se çdo gjë është në dritë të kuqe.
Tahiri u shpreh se një çështje tjetër shqetësuese është marrëveshja e zonave ekonomike mes Greqisë dhe Italisë e cila është bërë pa prezencën e Shqipërisë çka do të thotë që nëse marrëveshja ratifikohet nuk mund të presim dhe të pretendojmë që të kemi zonë ekonomike ekskluzive në detin Jon.
Gazmir Tahiri: Lajmi tjetër është se pak ditë përpara se të ndodhte kjo Këshilli i Sigurimit të Kombeve të Bashkuara ka ratifikuar marrëveshjen e zonave ekonomike midis Greqisë dhe Egjiptit çka është tani e zyrtarizuar dhe në radhë në këtë dosje është marrëveshja e zonave ekonomike me Italinë. Shqetësuese është që marrëveshja e zonave ekonomike midis Italisë dhe Greqisë ka qenë pa prezencën e Shqipërisë. Është një marrëveshje arbitrare dhe duke qenë marrëveshje arbitrare pala shqiptare nuk është pyetur duke i vendosur dhe vulën e Këshillit të Lartë të Greqisë. Është fatkeqësi të konstatojmë që zona ekonomike ekskluzive e Shqipërisë në detin Jon, është diçka e fshirë realisht tani. Zyrtarisht nëse marrëveshja me Greqinë dhe Italinë ratifikohet nuk mund të presim dhe të pretendojmë që të kemi zonë ekonomike ekskluzive në detin Jon.
