Është mbyllur gara për vakancat në Këshillin e Lartë të Prokurorisë (KLP) pas shkarkimit nga Vettingu të dy anëtarëve, Besnik Cani dhe Arben Dollapaj.
Në garë janë 5 prokurorë. Dy nga prokuroria e Vlorës, një nga Durrësi, një nga Berati e një nga Tirana.
Sipas asaj që mëson Ora News, Bert Kuliçi dhe Elona Alvora janë dy prokurorët e Vlorës që garojnë për anëtarë të Këshillit të Lartë të Prokurorisë (KLP).
Brenda javës pritet që Prokuroria e Përgjithshme të nxjerrë datat e votimit sipas prokurorive.
Cani u shkarkua nga posti i prokurorit për shkak të problemeve me pasurinë, vendim i Kolegjit të Posaçëm të Apelimit çka solli edhe humbjen e mandatit si anëtar KLP-je.
Për të njëjtin shkak, për probleme me pasurinë u shkarkua edhe Arben Dollapaj.
Aktualisht KPL ka 9 prokurorë, nga 11 që është numri i plotë i saj.
Plotësimi i vakancave ishte parashikuar që të bëhej që në nëntor por Prokuroria e Përgjithshme pezulloi aplikimet pas urdhrit të Komitetit Teknik të Ekspertëve për të ndaluar grumbullimet në vende të mbyllura apo të hapura.
