Kryeministri Edi Rama ka thënë gjatë konferencës për mediat nga stadiumi “Air Albania” se Shqipëria ka qenë një vend i suksesshëm në luftën me Covid-19.
Rama ka thënë se autoritetet janë treguar të vëmendshëm në këtë beteje dhe kanë analizuar çdo të dhënë përgjatë gjithë kësaj kohe.
Rama: Nëse do të gjeni sot një vend nga SHBA, te Franca, te Britania, Suedia do të merrni përgjigjen për pyetjen që bëni, hajdeni. Kur do të mbarojë me datë vaksinimi. Nëse do të gjeni një ne do të jemi dytët që do të japim përgjigjen.
Unë po iu them që siç ka ndodhur që nga dita e parë deri sot, edhe me strategjinë e vaksinimit, edhe me planin nuk gjeni dot një vend që ta ketë me ndonjë diferencë nga pikëpamja e konceptimit nga ne. Jo se jemi më të zot, por se jemi shumë më të vëmendshëm, analizojmë dhe nuk flemë shumë. Është një grup i tërë njerëzisht që nga dita e parë që merret me këtë punë. Ditë natë mbledhin të dhëna, i vënë në tavolinë, analizohen dhe dalin në përfundim. Ka vende që janë më të zhvilluar se ne, por s’kanë modestinë tonë për të mësuar dhe për të pasur vetëdijen çdo ditë. Kjo është arsyeja pse Shqipëria ka qenë i suksesshëm në këtë luftë.
