Kreu i Partisë Republikane Fatmir Mediu i ka shkuar në zyrë Lulzim Bashës, me shpresën se mund të arrihet një marrëveshje për koalicion mes tyre në zgjedhjet e 25 prillit. Edhe pse diskutimet mes tyre dhe grupi negociatar vijon prej një kohe të gjatë ende nuk ka një të tillë. Gjatë ditës së sotme Basha është takuar edhe me kreun e PDIU-së, Shpëtim Idrizi me të cilin ende nuk ka arritur një marrëveshje si do garojnë për zgjedhjet e 25 prillit.
Duket se negociatat mes republikanëve dhe demokratëve kanë ngecur në kalkulimet sesa kandidatë të PR duhet të përfshihen në listën zgjedhore dhe pozicionimi i tyre. Mediu nuk tërhiqet nga kërkesa për një vlerësim sa më të drejtë të peshës elektorale të partisë që drejton, ndërsa është shprehur më parë se ai nuk kërkon nga PD-ja pazare, por një koalicion që t’i japin fund pushtetit të Ramës dhe pesha e PR të vlerësohet për atë që është duke e krahasuar edhe me rezultatin e zgjedhjeve në 2017.
Edhe pse PR dhe PD nuk kanë ende një marrëveshje mes tyre, ndryshe nga aleatët e tjerë të vegjël të Bashës, Mediu vijon të ecë para me programin e tij duke mos ngelur peng i PD. Ai ka prezantuar kandidatët e PR-së në disa qarqe dhe ka regjistruar edhe Partinë Republikane në KQZ për zgjedhjet e 25 prillit. Mediu madje nuk ka ndalur as 'kërcënimet' gjatë deklaratave në media se nëse nuk gjen gjuhën e përbashkët me Lulzim Bashën do të garojnë të vetëm më 25 prill.
Ndërkohë kryedemokrati Basha ka mbyllur një marrëveshje me 3 parti aleate dhe i ka premtuar vende të sigurta në lista, Agron Dukës në Durrës, Nard Ndokës në Shkodër dhe Dashamir Shehit në Tiranë.
