Mësimi plotësues u bojkotua nga nxënësit e shkollës së bashkuar në Suç të Klosit, dhe u kthye në një protestë për shkollën e dëmtuar. Godina ku ata mësonin u mbyll pas tërmetit të 26 nëntorit 2019, dhe prej asaj kohe 250 nxënës detyrohen të bëjnë mësimin në ambiente që i cilësojnë të papërshtatshme.
Rreth 250 nxënësit e shkollës së bashkuar “Haxhi Lata” në Suç të Klosit e bojkotuan në shenjë proteste nisjen e mësimit plotësues.
Me prindërit në mbështetje u mblodhën para godinës së shkollës që qëndron e mbyllur pasi u dëmtua nga tërmeti i 26 nëntorit 2019.
"Tërmeti ka rënë në nëntor, 6 muaj vazhdoi shkolla derisa u mbyll në qershor. Pas mbylljes së shkollës i regjistruan nxënësit dhe futën një gënjeshtër deri në janar."
Vitin e kaluar, ata e zhvilluan mësimin në fshatin Kujtim në një objekt që sipas tyre është i papërshtatshëm dhe ku nuk duan të rikthehen.
"Te kisha nuk shtyhet më."
"Nuk ishte shkollë por shkollë e prishur."
Prej dy vitesh godina qëndron e kyçur dhe ende nuk ka asnjë vendim nësë ajo do të shembet apo do të rikonstruktohet.
"Duhen specialistë, shkolla nuk ka lëvizur, është si ka qenë."
Prindërit e mbledhur nga fshatrat e njësive Suç e Gurrë, thonë se dërgimi i fëmijëve në shkolla të tjera është kosto e shtuar, ndaj thonë se bojkoti do të vijojë edhe me nisje e vitit të ri shkollor.
"Bojkotojmë fillimin e mësimit në shkolla të tjera."
Bashkia e Klosit thuhet se është në pritje të një vendimi përfundimtar nga Instituti i Ndërtimit në Tiranë se çfarë duhet bërë me shkollën e Suçit.
Prindërit nga ana tjetër kërkojnë rivlerësim me ekspertë të pavarur, ndërsa nxënësit një vend të përshtatshëm për të mësuar.
