Ministrja e Punëve të Jashtme të Shqipërisë, Olta Xhaçka, e cila është në krye të task-forcës për strehimin e afganëve dha një intervistë për Zërin e Amerikës.
Ajo u shpreh se faturën financiare për refugjatët në vendin tonë do ta paguajnë partnerët. “Partnerët kanë sugjeruar përballimin e kostove nga ana e tyre. Për momentin janë duke u trajtuar me të njëjtat kosto që kanë pasur shqiptarët pas tërmetit”, tha ajo. Këto reagime vijnë pasi në media sot kanë qarkulluar lajme se faturën për strehimin e afganëve nuk e mbulojnë autoritetet amerikane por OJQ të ndryshme.
Në lidhje me qendrimin në Shqipëri, Znj. Xhaçka theksoi se do të nevojiten rreth 12 muaj, ose edhe më shumë, pasi është një proces i gjatë.
“Është një proces që mund të kërkojë deri në 12 muaj ndoshta edhe më shumë. Mes strehimit dhe procesimit të tyre, do të ketë një kohë të konsiderueshme. 12 muaj do të jenë minimumi për të mos thënë që do të zgjasë edhe më shumë se aq”, tha ajo.
Olta Xhaçka tha se do të ishte e kënaqur nëse një pjesë e afganëve do të dëshironin që të qëndronin përgjithmonë në Shqipëri.
“Patjetër, ua thashë që bëhet fjalë për elitën kulturore, shoqërore të Afganistanit. Janë gazetarë, mjekë, financierë, inxhinierë, etj. Janë kualifikime me të cilat do të aplikonin për programe të emigracionit në çdo vend.
Ne kemi shprehur gatishmërinë për t’i pranuar me kushtin apo dëshirën e shprehur për të vazhduar drejt SHBA-së, por nëse do të shprehin dëshirën të qëndruar do të ishim shumë të kënaqur që ta bënin Shqipërinë shtëpinë e tyre”.
Deri tani në Shqipëri janë akomoduar 662 afganë nga 4 mijë që pritet që të vijnë në total.
