Ka mbërritur rreth orës 18:00 në Spitalin e Traumës në Tiranë 21-vjeçari Aldi Rama, i cili dyshohet si autori i vrasjes së efektivit të policisë Saimir Hoxha, ngjarje e ndodhur mëngjesin e sotëm në ishull Lezhë.
Kujtojmë që Aldi Rama qëlloi veten me plumb në kokë, duke mos pranuar të dorëzohet pas 5 orësh në kërkim nga policia.
I riu u nis menjëherë drejt Spitalit Rajonal të Lezhës, por duke qenë se gjendja e tij ishte kritike, 21-vjeçari u transportua drejt Spitalit të Traumës në Tiranë.
Aldi Rama po mbahet i intubuar, me frymëmarrje të drejtuar dhe me kokën e fashuar. Raportohet se ai ka marrë dëmtime në kokë nga predha e armës së zjarrit, që i ka prekur edhe zonën e trurit. Po ashtu burime bëjnë me dije se ai ka qëlluar nga ana e majtë dhe plumbi ka përshkuar tejpërtej.
Aldi Rama ndodhet në reanimacion dhe po i nënshtrohet analizave pasi ekziston frika se ka pësuar një hemorragji të brendshme.
Po ashtu ai po i nënshtrohet ekspertizës mjekoligjore.
Burimet thonë se pranë tij nuk ka asnjë të afërm, ndërsa parametrat jetësore janë të dobëta.
