Policia e Fierit ka arrestuar një 20-vjeçar të identifikuar si Gledis Mehalla, i cili ishte shpallur në kërkim ndërkombëtar nga Anglia, pasi dyshohet se ka vrarë në Janar të këtij viti një person, së bashku me dy shokët e tij Josif Nushi, 26 vjeç, dhe Mihal Dhana, 27 vjeç.
Për kapjen e 3 të rinjve u dha dhe një shpërblim nga policia angleze, ndërkohë që Mehalla është arrestuar në vendin e tij të lindjes, Lushnje.
Burime nga DVP Fier bëjnë me dije se Komisariati i Policisë Lushnjë në bashkëpunim me Forcën e Posaçme “Shqiponja” në DVP Fier dhe me Interpol Tirana, kanë bërë të mundur lokalizimin, kapjen dhe arrestimin provizor, me qëllim ekstradimin drejt Mbretërisë së Bashkuar të shtetasit Gledis Mehalla, 20 vjeç, banues në fshatin Gradishtë, Lushnjë.
Ky shtetas ishte shpallur në kërkim ndërkombëtar, pasi autoritetet Gjyqësore në Kardif/ Mbretëri e Bashkuar, më datë 04.05.2021 kanë lëshuar urdhër arresti për veprën penale “Vrasja”.
Materialet do i kalojnë Prokurorisë pranë Gjykatës së Shkallës së Parë Lushnjë, për veprime të mëtejshme.
