Gazetarja Klodiana Lala, në një lidhje direkte për “News 24” nga vendi ku është gjetur trupi i pajetë i biznesmenit Ruzhdi Hoxha është shprehur se për shkak të terrenit të vështirë është e pamundur lëvizja e trupit të tij.
Ajo tha se policia po pret një grup të forcave RENEA.
“Trupi i pajetë i Ruzhdi Hoxhës nuk është lëvizur akoma për shkak të terrenit të vështirë. Policia është në pritje të një grupi special të RENEA-s për nxjerrjen e tij. Në këto momente janë pyetur edhe miqtë dhe familjarët e tij.
Ata kanë pretenduar se kanë pirë një birrë të gjithë dhe më pas Fred Rushaj e ka marrë me makinë”, tha gazetarja Lala.
Bëhet fjalë për një rrëpirë rreth 200-300 metra, madje policët janë dëmtuar në përpjekjet për nxjerrjen e trupit.
Ndërkohë nuk dihet nëse Fredi Rushaj është i vetëm në këtë çështje apo ka edhe persona të tjerë.
Mendohet se për shkak se trupi kishte filluar dekompozimin ai të jetë vrarë që natën kur është rrëmbyer.
