Qyteti i Lushnjes prej katër ditësh nuk po furnizohet me ujë të pijshëm.
"5 ditë pa ujë”
Shkak mësohet se është bërë zëvendësimi i tubit kryesor të furnizimit nga Burimet deri në Depot e Virovës.
Por rrjeti i ri thuhet se nuk e përballon presionin që krijohet, duke ngritur dyshime për cilësinë e punimeve.
Në këto kushte banorët po detyrohen ta sigurojnë ku të munden duke mbushur kova e bidonë.
“Që prej të premtes nuk ka ujë. Po marrim nga puset.”
Mbetet e paqartë edhe sa ditë Lushnja do të mbetet pa ujë, ndërsa banorët tashmë janë në alarm pasi mungesa e ujit në shtëpi për shërbimet higjienike rrezikon një krizë shëndetësore në qytet.
Të zhgënjyer me situatën dhe drejtuesit vendor janë emigrantët e kthyer për festat pranë familjes.
Pa ujë në shtëpi, thonë se po detyrohen të ikin sërish.
“Dje erdha sot do iki. Atje ku banoj unë nuk ndërpritet uji ndonjëherë.”
Drejtuesit e Ujësjellësit dhe Bashkisë së Lushnjes thonë se prej 24 orës po punojnë për të rikthyer furnizimin e qytetit me ujë nga tubacioni i Vjetër.
Në fakt tenderi për rehabilitimin e linjës së ujësjellësit ka kushtuar rreth 2 milionë euro dhe është fituar nga një grup kompanish në muajin maj të vitit 2020.
