Ambasadorja Yuri Kim ka uruar Arben Kingjin për emërimin e tij në postin e Shefit të Shtabit të Përgjithshëm të Forcave të Armatosura.
Në një postim në Twitter, Kim thotë se duhet forcuar bashkëpunimi ushtarak si aleatë të NATO-s, teksa mbrojmë paqen e sigurinë në rajon dhe botë.
Postimi i Yuri Kim:
Urime Gjeneral Brigade Arben Kingjit për emërimin si Shef i Shtabit të Përgjithshëm të Forcave të Armatosura të Shqipërisë. Presim me kënaqësi të punojmë me të për të vazhduar forcimin e bashkëpunimit ushtarak përfshirë si aleatë në NATO, ndërsa mbrojmë paqen e sigurinë në rajon dhe në mbarë botën.
Arben Kingji u emërua sot Shef i Shtabit të Përgjithshëm të Forcave të Armatosura me anë të një dekreti nga Presidenti Bajram Begaj.
Deri në këtë moment, Arben Kingji mbante detyrën e Komandantit të Forcës Tokësore ndërkohë që më herët ka mbajtur detyrën e komandantit të Batalionit të Mbështetjes në Shtabin e Përgjithshëm të Forcave të Armatosura.
Gjithashtu bëhet me dije se Kingji ka ushtruar edhe detyra të tjera si ajo e atasheut ushtarak të Shqipërisë në Rumani.
Më herët ai ka qenë edhe komandant i Policisë ushtarake. Ka kryer Kursin e Shtabit të Përgjithshëm në Akademinë e Mbrojtjes në Tiranë. Kingji ka mbajtur detyrën e komandantit të kontingjentit në disa misione në Afganistan e Irak.
Në vitin 2016 ai përfundoi edhe studimet për drejtësi në Winsdom University.
