Kreu i Emergjencave Civile Haki Çako ka reaguar në lidhje me situatën në veri të vendit duke dhënë shpjegim edhe në lidhje me kërkesën e grupit të Enkelejd Alibeajt, i cili kërkoi të shpallet gjendja e fatkeqësisë natyrore.
Në një lidhje për Euronews Albania, ai është shprehur se në rastin aktual nuk ka asnjë kriter për marrjen e këtij vendimi për sa kohë përmbytjet janë të menaxhueshme. Ai vlerësoi si tregues pozitiv faktin se niveli i ujit në Drin, Bunë, Gjadër dhe Kir është në rënie.
“Në rastin aktual nuk jemi në asnjë kriter për sa kohë përmbytjet janë të menaxhueshme, të gjitha kapacitetet e shtetit, të pushtetit vendor janë në dispozicion. Ajo që është më pozitivja që situata është drejt përmirësimit, niveli në Drin, Bunë, Gjadër dhe Kir është në rënie.
Ligji i ka të qarta kriteret për shpalljen e gjendjes së fatkeqësisë dhe zotërinjtë deputetë i njohim mirë se e kanë votuar vetë ligjin. Edhe një element tjetër; të gjitha dispozitat e BE kanë të specifikuar mënyrën si funksionin shteti, njësitë e pushtetit vendor”, tha Çako.
