Ndërsa kryeministri Edi Rama publikoi vendimin për rritjen e pagave, kryetari i Partisë së Lirisë, Ilir Meta, ngjiti shkallët e selisë së Partisë Demokratike për t’u takuar me aleatin e tij Sali Berisha.
Në fund të takimit për gazetarët, Meta sqaroi se në fokus të takimit ishte fushata zgjedhore dhe beteja e 14 majit dhe sipas tij vendimet për rritje pagash nuk do të ndikojnë në rezultat, pasi qytetarët e dinë se çfarë ka bërë kryeministri Rama përgjatë 10 viteve që ka drejtuar vendin.
“Qytetarët janë mësuar me mashtrimet e përsëritura të Edi Ramës, qytetarët e dinë sa falas është shëndetësia, ata e dinë se Rama kujtohet për ta vetëm para zgjedhjeve. Qytetarët e dinë se përgjegjës për shtrenjtimin e kostos së jetesës si në asnjë vend tjetër është vetëm Edi Rama.”
Meta shmangu komentet për deklaratën e ambasadores amerikane në Tiranë kundër Sali Berishës, por theksoi se koalicioni i opozitës do të fitojë betejën e 14 majit.
“Kandidatët e zgjedhur nga opozita janë kandidatë që përfaqësojnë vlerat më të mira të qytetarisë. “
Gjatë javës së ardhshme Ilir Meta pritet të takohet me Gabriel Escobar, por sipas tij ky takim nuk ndryshon asgjë në marrëveshjen mes Partisë së Lirisë dhe Sali Berishës e demokratëve që e mbështesin.
