Në programin “Dola te Ola” këtë të diel ishte e ftuar ish-deputetja e Kuvendit të Shqipërisë dhe ish-ministrja e socialistëve Arta Dade.
Duke komentuar fotot e jetës së saj, Dade kujtoi se i ati e ka patur shumë pasion fotografinë, ndaj ajo, motra dhe vëllai i saj kanë pafund fotografi nga fëmijëria e tyre. Tejet e lumtur Arta Dade rrëfeu se prindërit e saj janë ende gjallë dhe për fatin e mirë familja e saj po shijon ekzistencën e katër brezave.
Ish-deputetja kujtoi se ka patur dhe ka një marrëdhënie të ngushtë me prindërit, teksa e cilësoi nënën e saj si shembullin e sakrificës, mirësisë dhe që gjithë vëmendjen ia kushtonte fëmijëve.
Dade tha se prindërit e saj prej 63 vitesh kanë jetuar me vëllain e saj dhe bashkëshorten e tij, por tashmë këta të fundit janë larguar drejt Amerikës dhe është ajo që përkujdeset për prindërit.Kur në studio u shfaq një foto me djalin e saj të madh, Arta Dade tha se edhe për të, sikurse për çdo grua, momenti kur është bërë nënë për herë të parë është “momenti më domethënës dhe më i bukuri i gjithë jetës”.
Përveçse një pedagoge dhe politikane që janë angazhimet e saj të mirëfillta profesionale, ish-deputetja së fundmi ka provuar edhe aktrimin. Teksa në “Dola te Ola” u shfaqen momente nga shfaqja teatrale ku ajo ka marrë pjesë, Dade foli me shumë emocion. Ish-deputetja është ngjitur në skenë përkrah emrave të mëdhenj të skenës së teatrit dhe kinematografisë shqiptare, me një monolog të cilin e ka realizuar në mënyrë të përkryer.
Arta tha se si fillim mendoi se shfaqja nuk do të donte shumë angazhim, por pasi e mori përsipër u përpoq ta realizonte më së miri në mënyrë që mos të stononte përkrah profesionisteve të vërteta.
“Një shfaqje shumë e bukur dhe me shumë emocion”, tha ajo, teksa shtoi se aty kuptoi më mirë edhe vështirësitë me të cilat përballen artistët shqiptarë.
