Deputeti i Partisë Demokratike, Tritan Shehu tha në një intervistë për Euronews Albania se protesta e opozitës në Kuvend për të marrë të drejtat që ua njeh kushtetuta, do vijojë.
Ai u shpreh se grupi i Berishës dhe i Bardhit janë të bashkuar në aksionin opozitar në Parlament por shtoi se është momenti që ky bashkim të formalizohet.
“Baza e PD është krejtësisht në union me ato që thotë Berisha, PD. Në këtë lëvizje është e domosdoshme, të zgjerohet harku i pjesëmarrjes. Në Parlament jemi të gjithë bashkë, dhe jam i bindur që do të jemi edhe kudo jashtë, kam bindjen.
Ka vend akoma që ky sinkronizim i deputetëve në parlament të formalizohet më tepër, të jetë më shumë e organizuar e nominuar edhe në elementë formale dhe besoj se këtu do arrijmë së shpejti; ne veprojmë së bashku por ky bashkim duhet formalizuar. Duke vepruar bashkë edhe në nivele formale, edhe nëpër linjat e një organizimit formal brenda dhe jashtë parlamentit”, tha Shehu.
