Drejtori i Agjencisë Kombëtare të Mbrojtjes Civile, Haki Çako, është paraqitur paraditen e kësaj të premteje në Prokurorinë e Posaçme kundër krimit të Organizuar dhe Korrupsionit.
Në një prononcim të shkurtër për mediat Çako theksoi se është thirrur për një çështje që nuk lidhet as me detyrën e as me institucionin që ai përfaqëson.
“Jam thirrur për një çështje që nuk lidhet as me detyrën e as me institucionin që unë përfaqësoj”-tha ai.
Haki Çako më herët ka mbajtur dhe detyrën e Drejtorit të Përgjithshëm të Policisë së Shtetit. Sipas informacioneve që ka Euronews Albania, Çako është thirrur për një hetim që SPAK po kryen lidhur me çështjen e rindërtimit pas tërmetit të 26 nëntorit të 2019.
