Reshjet e dëborës janë rikthyer këtë të martë në zonat malore të juglindjes së vendit.
Edhe pse jemi në fillim të pranverës, dëbora ka shkuar në një trashësi 5-8 cm në lartësitë në mbi 1300 m, përfshi këtu edhe majën e Bigllës në afërsi të fshatit turistik të Dardhës.
Reshje dëbore raportohet të ketë patur edhe në aksin Shtyllë – Mashkullorë aty ku trashësia ka shkuar në disa cm.
Reshje dëbore ka pasur edhe në të njëjtat lartësi të fshatrave të thellë të Voskopojës e Lekasit.
Aksi rrugor i Dardhës është i kalueshëm pa probleme. Edhe në rrugët e tjera duke përfshirë ato të njësisë administrative Lekas e Vithkuq nuk ka probleme në qarkullimin e mjeteve.
Burime zyrtare thanë se nuk ka patur probleme përsa i përket furnizimit me energji elektrike përfshi dhe fshatrat e zonave malore Gorë e Moglicë.
