Sipërmarrësi Albion Meta nga “Diaspora për Shqipërinë e Lirë, në emisionin Sintezë në News24, foli për hapat që duhen hedhur për të garantuar të drejtën e votës për diasporën.
Meta tha se vota e diasporës nuk është çështjes flamujsh mes partive politike, por është një çështje që duhet të marrë zgjidhje.
“Është e paimagjinueshme që një vendim i Gjykatës Kushtetuese të mos merret në konsideratë nga institucionet e tjera.
Mendoj se e drejta e votës së diasporës shqiptare nuk ka lidhje me njërën apo tjetrën palë politike, por është një objektiv final, një tendencë për të rritur kualitetin e të bërjes politikë në Shqipëri.
Ne kemi skenarin më optimist, që na bën që të mendojmë pozitivisht se kjo nismë, pra vota e diasporës do të bëhet realitet”, tha Meta.
Sipas tij, nëse kjo e drejtë mohohet, do të krijojë një tjetër imazh negativ për Shqipërinë, qoftë edhe për integrimin e saj në BE.
Meta tha se shtete të afërta me ne, si Kroacia apo Kosova, e kanë një praktikë efikase dhe eficente.
