Temë e emisionit “Review” në Euronews Albania këtë të shtunë ishte skandali mikrokredive, ku pati përplasje mes ekspertëve të ekonomisë mbi masat që duhet të kishte marrë Banka e Shqipërisë.
Ekonomisti Pano Soko tha se shteti duhet të kishte ndërhyrë duke blerë kreditë e këqija që iu shitën kompanive të mikrokredive. Ai hodhi dyshime se skema u la qëllimisht pasi kishte përfitime të mëdha të cilat mund të kenë korruptuar individët që duhet t’i kontrollonin.
“Heqja e licencës nuk është bërë as para një muaji. Problemi është pse nuk u mor parasysh kjo gjëja. Sepse ne pamë aty ishte bërë leku i madh dhe ky leku i madh ka mbyllur gojën dhe sytë e njerëzve. Shyqyr që prokuroria është duke provuar këtë që them unë. Këtu është bërë masakër me jetët e njerëzve. A nuk do të ishte mirë që këto kredi të ishin fshirë fare se nga 86 milionë euro t’i more 7 milionë, ose t’i blente shteti”, tha Soko.
Nga ana tjetër eksperti Spiro Brumbulli tha se shteti nuk ka punë të blejë kreditë e këqija pasi është marrëdhënie mes privatëve. Ai shtoi se Banka e Shqipërisë i ka marrë të gjitha masat përkatëse për 2 nga 26 kompanitë e mikrokredive të cilat kanë abuzuar.
“Janë 26 institucione financiare të cilat mbikqyren nga Banka e Shqipërisë, ne po flasim për rastin e dy institucioneve që janë bërë problem, MCA dhe një tjetër. Pra nga 26 janë 2 dhe nuk është se nuk kanë qenë nën mbikqyrje. Janë marrë masa nga Banka e Shqipërisë. Në 2022 i është lënë 1 vit kohë të bënin regullimet, pas një viti nuk bën rregullimin iu dha 6 muaj kohë të shisnin portofolin. Me arrestimin e tyre janë thyer të gjitha pikat dhe normal që do mbyllen”, tah Brumbulli.
