Shtyhet për të disatën herë seanca paraprake për ish-ministrin e Shëndetësisë Ilir Beqaj dhe personat e tjerë të akuzuar për dosjen e “Sterilizimit”. Shkak u bë mungesa e një prej avokatëve.
Ish-ministri i Shëndetësisë ishte i pranishëm në seancë, ku u shfaq tepër i irrituar duke nisur të kundërshtojë veprime e SPAK. Aktet e sjella në gjykim përmbajnë të pavërteta pretendoi ish-zyrtari nën akuzë për “Shpërdorim detyre”.
Ai kërkoi të bënte një deklaratë për aktet procedurale që lidhen me hetimin tjetër të dosjes SASPAC, teksa reagimi i Beqajt vjen dy ditë pasi në një banesë të pretenduar prej tij të marrë me qira në Vlorë, u ushtruan kontrolle nga hetuesit e Byrosë Kombëtare të Hetimit.
Por nga ana tjetër ndërhyri gjykata duke i kujtuar Beqajt se jemi ende në fazën e legjitimimit të palëve dhe do t’i jepet mundësia për t’u shprehur në një moment tjetër.
Seanca ku gjykata do të shprehet nëse dosja kalon për gjykim ose jo, u shty për në datën 12 shtator.
Kujtojmë se SPAK ka mbyllur hetimet dhe ka dërguar në gjykatë dosjen për “Sterilizimin” në ngarkim të ish-ministrit së Shëndetësisë.
Beqja akuzohet për veprën penale “Shpërdorim i detyrës”, ndërsa do të jetë në bankën e të akuzuarve së bashku me ish-zëvendësin, Klodian Rrjepaj dhe biznesmenin Ilir Rrapaj që mori kontratën.
Hetimet për koncesionin e sterilizimit janë kryer nga prokurorët Edvin Kondili dhe Ened Nakuçi, ndërsa SPAK akuzon për shkelje me vlerë 100 milionë euro.
Prokuroria thotë se në dhënien e koncesionit të akuzuarit nuk kanë respektuar ligjin dhe kanë shpërdorur detyrën. Ndër gjetjet e konstatuara nga SPAK janë edhe procedurat e ndjekura për fituesin por dhe mos realizimi i kushteve të parashikuara në kontratë.
