Gazetari Bledian Koka tha në një intervistë për një emision televiziv se efektet e Kongresit të Partisë socialiste të mbajtur sot nuk janë të menjëhershme.
Sipas tij kryeministri Rama shpesh evidenton me fjalë të mira njerëzit që kanë marrë të tatëpjetën politike. Koka tha se kongresi sotëm tregoi se ka klane brenda Partisë socialiste dhe sipas tij në krye të këtyre klaneve është kryeministri.
“Shpesh herë zoti Rama bën pikërisht këtë gjë. Njerëzit që kanë marrë të tatëpjetën politike, ai i evidenton me fjalë të mira sepse në këtë mënyrë ai ka për të pasur gjithmonë raportin e bashkëpunëtorëve të tij, të cilët i fryn, i mban e nga ana tjetër u hap gropa në të cilën ata bien pak nga pak. E gjithë dinamika e sotme tregon pikërisht këtë gjë dhe konfirmon që ka apo ska plane në Partinë Socialiste.
Sigurisht që Zoti Rama është njeriu në krye, por që ai në një farë mënyre argëtohet duke luajtur me këto lloj sensitivitetesh dhe me këtë lloj ndjesish. Atë që në fakt nuk e tha zoti Rama e tha Spiropali në fjalën e saj. Ajo foli për njerëz me ambicie personale që nuk duhet të shkatërrojnë partinë, të cilët praktikisht mund të marrin ndonjë goditje. Ajo pjesë e fjalimit të Spiropalit fliste së pari për një rishpikje të Partisë Socialiste por edhe për brryla brenda partisë, ishte edhe mesazhi i fundit i Ramës ‘alla Fidel Kastro’ ”,-tha gazetari Koka.
