Dy infermiere të azilit të pleqve ku ndodhi vrasja janë ndaluar nga policia kriminale e Tiranës, raporton gazetari Ervin Leka. Kanë qenë oficerët e komisariatit nr.1 që pas hetimeve kanë zbuluar se infermierja e turnit në azilin e pleqve ka kryer veprime që pengojnë zbardhjen e të vërtetës.
Sipas hetimeve, infermierja pasi ka parë se i moshuari ka ndërruar jetë ka njoftuar morgun një agjenci funerale për të tërhequr trupin pa treguar se çfarë kishte ndodhur. Kur do kryheshin procedurat në morg është zbuluar se i moshuari ka pasur dëmtime serioze.
Në këtë mënyrë është zbuluar se Virxhil Vesho është rrahur brutalisht me shkop metalik nga Zyhdi Shehu. Tashmë pritet që infermieret e ndaluara të japin versionin përfundimtar dhe pritet nëse ndaj tyre do të ngrihet akuza e veprimeve që pengojnë zbardhjen e të vërtetës.
Përveç sklerozës, Zyhdiu vuan edhe nga Parkinsoni dhe demenca. Nga hetimet ka rezultuar se viktima dhe i moshuari ndryshe nga sa u tha në fillim nuk ishin shokë dhome. Edhe viktima vuante nga skleroza dhe rreth orës 4 të mëngjesit ka ngatërruar dhomë dhe ka shkuar te dhoma e 78-vjeçarit, i cili ishte i vetëm.
Ky i fundit është trembur dhe ka pretenduar se i ka zënë krevatin dhe e ka goditur me bastun. 78-vjeçari ZyHdi Shehu, sipas asaj çka kanë deklaruar infermieret kishte në disa raste edhe haliçunacione.
Policia ka ndaluar kryeinfermieren dhe infermieren e turnit, pasi të moshuarit duhet të monitorohen gjatë natës dhe nuk mund të lëvizin të vetëm për shkak të sëmundjeve që kanë.
