Tre shtetas kinezë janë arrestuar dhe një i katërt është proceduar në gjendje të lirë, pasi dyshohet se organizonin veprimtaritë e kundërligjshme të lojërave të fatit dhe të prostitucionit, shkruan A2 CNN.
Policia e Shtetit njoftoi se këta shtetas u kapën në flagrancë në Rinas, pasi tentuan të kontrabandonin në Shqipëri 12 celularë, 3 laptopë, 6 kompjuterë dhe pajisje të tjera elektronike, të cilat i përdornin për këto veprimtari të kundërligjshme.
“Komisariati i Policisë Rinas, në bashkëpunim me Drejtorinë për Hetimin e Krimeve Ekonomike dhe Financiare dhe me Drejtorinë për Hetimin e Krimeve Kompjuterike, në Departamentin e Policisë Kriminale në Drejtorinë e Përgjithshme të Policisë së Shtetit, bazuar në informacionet e siguruara nga inteligjenca policore, organizoi dhe finalizoi operacionin policor të koduar “Electronics”.
Si rezultat i këtij operacioni u arrestuan në flagrancë shtetasit kinezë: N. X., 19 vjeç, C. L., 43 vjeç dhe Sh. J., 49 vjeç, të tre banues në Kinë. Gjithashtu, nisi procedimi në gjendje të lirë për shtetasin Y. L., 17 vjeç, banues në Kinë”.
