Mediat greke kanë nisur teoritë konspirative lidhur me vizitën e presidenti turk Recep Tayyip Erdoğan.
Ai do të mbërrijë nesër në Tiranë, ku do të takohet me kryeministrin Rama, presidentin Begaj dhe do të bëhet inaugurimi i xhamisë së Namzagjasë. Pas shumë përplasjesh, duket se janë sheshuar mosmarrëveshjet mes Ankarasë dhe Komunitetit Mysliman, teksa është gjetur dhe mënyra e drejtimit të xhamisë.
Por mediat greke shkojnë më tej. Sipas tyre, vizita e Erdoganit lidhet dhe me krijimin e shtetit bektashi. Madje “Protothema” shkon deri aty sa deklaron se Erdogan do të ketë dhe një takim me Baba Mondin. Nuk e dimë nëse është konspiracion apo mediat greke kanë arritur të sigurojnë informacione të sigurta, pasi mediat turke shprehen se vizita e tij bëhet pikërisht për të ndalur shtetin bektashi.
Shkrimi i “Protothemës”
Presidenti i Turqisë, Recep Tayyip Erdoğan do të vizitojë Tiranën nesër, e enjte, më 10 tetor, ku do të marrë pjesë në inaugurimin e xhamisë së re të Namazgjasë në kryeqytetin shqiptar.
Xhamia, ndërtimi i së cilës filloi në vitin 2015, konsiderohet më i madhi në Ballkan, me katër minare, secila 35 metra të larta, me një stil arkitekturor që të kujton epokën osmane. Përreth xhamisë do të ketë objekte që do të funksionojnë si qendër kulturore, bibliotekë, hapësirë ekspozite, sallë konferencash, “muze të bashkëjetesës” dhe shkollë për mësimin e Kuranit.
Komuniteti Mysliman Shqiptar ka lëshuar një deklaratë ku shpreh mirënjohje për “popullin vëlla turk”, Presidentin Erdogan dhe kryeministrin shqiptar Edi Rama që bënë të mundur ndërtimin e xhamisë së re të madhe në Tiranë.
Myftiu i Tiranës Gazment Teqja, është emëruar kryetar i Bordit Drejtues të fondacionit të përbashkët mes Komunitetit Mysliman dhe palës turke, që do të menaxhojë xhaminë e re.
Presidenti turk pritet të takohet në Tiranë edhe me liderin fetar të sektit mysliman bektashi në Shqipëri dhe në mbarë botën, Edmond Brahimaj, i njohur për ndjekësit edhe si Baba Mondi. Muajin e kaluar, një raport i New York Times zbuloi planin e kryeministrit Edi Rama për të krijuar një shtet sovran mysliman bektashi brenda territorit shqiptar, të modeluar sipas Vatikanit, gjë që shkaktoi një reagim nga përfaqësuesit e komunitetit të madh bektashi në Turqi.
Ndërsa axhenda zyrtare e Erdoganit në Tiranë nuk është bërë e ditur, burimet bëjnë me dije se ai pritet të bashkëkryesojë konferencën e planifikuar ndërqeveritare me kryeministrin shqiptar dhe do të pritet nga presidenti shqiptar, Bajram Begaj.
