Kreu i Shtetit, Bajram Begaj do të presë ditën e sotme (25 Nëntor) në Presidencë përfaqësuesit e Partisë Socialiste për t’u konsultuar për datën e zgjedhjeve të ardhshme parlamentare.
Gjithashtu, Bajram Begaj kishte thirrur sot në Presidencë edhe Partinë Demokratike për t’u konsultuar lidhur me datën e zgjedhjeve, por është refuzuar nga partia më e madhe opozitare në vend. Kreu i Grupit të PD-së,
Gazment Bardhi u shpreh se janë ftuar nga Kreu i Shtetit për të marrë pjesën në konsutime, ditën e hënë në orën 10:30, por theksoi se refuzon të përfshihet në një proces, siç e quajti ai, farsë.
Kreu i Shtetit priti në Presidencë më 21 Nëntor me përfaqësuesit e Partisë së Lirisë, Erisa Xhixho dhe Tedi Blushi, bisedime që u zhvilluan në mungesë të Ilir Metës për shkak se ndodhet në paraburgim.
Pas përfundimit të takimit, sekretari i Përgjithshëm i PL-së, Tedi Blushi u shpreh se çdo datë për ta është e pranishme përveç asaj të caktuar nga Taulant Balla.
“Sa i përket ditës së zgjedhjeve, qëndrimi i Partisë së lirisë, i shprehur qartësisht në këtë takim, ishte që për ne është e pranueshme cdo datë, përvec datës së caktuar nga Taulant Balla”, tha Sekretari i Përgjithshëm i PL-së.
Ndërsa më 20 Nëntor u takua dhe me krerët e partive të vogla, Dashamir Shehin, kreu i Aleanca Progresiste LZHK, Fatmir Mediun, kreu i Partisë Republikane, Agron Dukën, kreu i Partia Agrare Ambientaliste, Vangjel Dulen, kreu i Partia Bashkimi për të Drejtat e Njeriut, Shpëtim Idrizin, kreu i PDIU dhe Agron Shehajn, kryetari i Partisë Mundësia, të cilët propozuan datën 4 si më të përshtatshme për mbajtjen e zgjedhjeve.
Refuzimi i ftesës nga PD
Kreu i Grupit të PD-së, Gazment Bardhi i ka quajtur farsë konsultimet me Presidentin Bajram Begaj për datën e zgjedhjeve të ardhshme parlamentare, duke u shprehur se dita kur do të zhvillohen është caktuar nga kryeministri Edi Rama.
Kreu i Grupit të PD-së theksoi se data është caktuar nga Rama dhe se presidenti pritet vetëm që të vulosë vullnetin e partisë në pushtet.
“Tashmë Rama-Balla e kanë caktuar datën e zgjedhjeve dhe Presidenti pritet vetëm të nënshkruajë e të vulosë vullnetin e partisë në pushtet. Farsa e gjoja konsultimeve me parti politike dhe madje edhe me individë pa parti, është një akt i shëmtuar që meriton vetëm të përbuzet”, shkruan ai.
Deklarata e plotë:
Të hënën, ora 10:30, Sekretari i Përgjithshëm i PD dhe Kryetari i Grupit Parlamentar të PD, janë ftuar zyrtarisht nga Institucioni i Presidentit të Republikës për t’u bërë pjesë e një procesi “konsultimesh” lidhur me datën e zgjedhjeve. Personalisht refuzoj të përfshihem në një proces farsë dhe që synon vetëm t’i jap legjitimitet një akti të diktuar në mënyrë antikushtetuese nga partia në pushtet.
Caktimi i datës së zgjedhjeve është kompetencë kushtetuese e Presidentit të Republikës dhe kurrësesi një akt që diktohet nga Edi Rama dhe Taulant Balla. Tashmë dyshja Rama-Balla e kanë caktuar datën e zgjedhjeve dhe Presidenti pritet vetëm të nënshkruajë e të vulosë vullnetin e partisë në pushtet.
Farsa e gjoja konsultimeve me parti politike dhe madje edhe me individë pa parti, është një akt i shëmtuar që meriton vetëm të përbuzet. Presidenti i Republikës ka patur të gjitha shanset që të vepronte si figurë unifikuese dhe të luante rolin kushtetues të Kreut të Shtetit. Ka qenë zgjedhja e Presidentit të Republikës që të bëhet palë politike dhe të mos mbajë asnjë qëndrim për gjendjen ku ndodhet sot Shqipëria.
Madje me heshtjen e tij shurdhuese, Presidenti i Republikës po nxit Trupin Diplomatik të Republikës së Shqipërisë në mbarë botën që të përfshihen në organizimin dhe pjesëmarrjen në turin e takimeve politike/elektorale të Partisë Socialiste, ku Edi Rama kërkon votë për partinë në pushtet në zgjedhjet e ardhshme.
Edhe pse është vënë zyrtarisht në dijeni, Presidenti i Republikës ende nuk ka marrë leje nga Edi Rama për të reaguar dhe për t’u distancuar publikisht nga ky veprim i paligjshëm i Trupit Diplomatik të dekretuar prej tij. Një President që sillet si palë politike meriton vetëm injorim dhe çdo takim me të është vetëm humbje kohe!
