Në një mesazh për 28 Nëntorin, sekretari i Shtetit të SHBA-së, Antony Blinken, shprehu urimet e tij për popullin shqiptar, duke theksuar marrëdhëniet e ngushta dhe partneritetin e fortë ndërmjet Shqipërisë dhe Shteteve të Bashkuara.
Blinken ka vlerësuar mbështetjen e Shqipërisë për vlerat demokratike dhe angazhimin e saj për paqe, siguri dhe sigurinë kolektive të NATO-s.
“Marrëdhëniet e ngushta midis kombeve tona janë ndërtuar mbi vlerat e përbashkëta demokratike dhe një dëshirë të ndërsjellë për paqe dhe siguri. Shqipëria i ka ilustruar këto vlera nëpërmjet mbështetjes së saj të palëkundur për Ukrainën përballë agresionit të paprovokuar rus, udhëheqjes së saj në Këshillin e OKB-së për të Drejtat e Njeriut dhe angazhimit të saj të palëkundur ndaj sigurisë kolektive të NATO-s. Ne vlerësojmë thellësisht mikpritjen dhe ndihmën e Shqipërisë si mikpritës i përkohshëm për aleatët tanë afganë”, thuhet në urimin e tij.
Ai ka përmendur gjithashtu përpjekjet e përbashkëta në luftën kundër korrupsionit dhe përforcimin e sundimit të ligjit, duke shprehur besimin se lidhjet mes popujve shqiptar dhe amerikan do të vazhdojnë të forcohen.
“Shtetet e Bashkuara presin me padurim partneritetin tonë të vazhdueshëm në ndjekjen e prioriteteve të përbashkëta, duke përfshirë luftën kundër korrupsionit dhe përpjekjet për të forcuar sundimin e ligjit. Ne mbetemi të përkushtuar për të mbështetur rrugën e Shqipërisë drejt integrimit të plotë në Bashkimin Evropian”, thuhet tutje në deklarimin e tij.
Gjithashtu, ai është shprehur i bindur se lidhjet e forta mes popullit shqiptar dhe atij amerikan do të vazhdojnë të lulëzojnë ndërsa punojnë së bashku “për tregtinë dhe investimet, diversifikimin e energjisë së rinovueshme dhe integrimin më të ngushtë të të gjithë rajonit”.
“Vazhdimi i bashkëpunimit të ngushtë në këto përpjekje do të forcojë Shqipërinë, marrëdhëniet tona dypalëshe dhe vlerat e përbashkëta që ne kremtojmë”, ka shtuar ai.
“I uroj popullit të Shqipërisë një festë të gëzuar të Pavarësisë”, ka përfunduar Blinken.
