Presidenti i Republikës, Bajram Begaj në ceremoninë e mbajtur me rastin e 112 vjetorit të shpalljes së pavarësisë dha mesazhin për politikën shqiptare, që duhet të jetë në një dialog të hapur me popullin.
Begaj u ndal tek zgjedhjet e ardhshme, duke thënë se duhet të jenë shembull i një faqeje të re, ku, siç u shpreh kreu i Shtetit, interesi i qytetarit dhe shërbimi publik ndaj tij vihet mbi gjithçka tjetër.
“Sot, më shumë se kurrë, politika duhet të ndjekë shembullin e tyre. Klasa politike duhet të jetë në një dialog të hapur me popullin, të dëgjojë shqetësimet, nevojat dhe ëndrrat e tij.
Kthejini sytë nga ata që përfaqësoni! Zgjedhjet e ardhshme duhet të jenë shembull i një faqeje të re, ku interesi i qytetarit dhe shërbimi publik ndaj tij vihet mbi gjithçka tjetër.
Kjo është mënyra për të nderuar ata që shpallën pavarësinë dhe për të ndërtuar një Shqipëri që e meriton vendin në Evropë.
Hapja e kapitujve me Bashkimin Evropian është më shumë se një proces teknik, është një test i pjekurisë tonë kombëtare.
Ky proces kërkon të forcojmë institucionet, të mbështesim drejtësinë dhe SPAK-un, të përmirësojmë cilësinë e jetesës së qytetarëve tanë dhe të ndërtojmë një Shqipëri të denjë për shqiptarët dhe për familjen evropiane”, tha nder te tjera Presidenti.
