Simone Del Vecchio, një i ri italian, ndodhet në spital prej 8 muajsh, pasi hoqi 20 dhëmbë njëherësh në një klinikë dentare në Tiranë.
Nëna e tij Anna ka rrëfyer se e gjeti djalin e saj të shtrirë në tokë dhe pa ndjenja, ndërsa më herët ai kishte pësuar një arrest kardiak.
Sipas saj në 13 mars të këtij viti Simone hyri në një klinikë në Shqipëri për një operacion dentar dhe përfundoi në shtratin e spitalit, ku ndodhet prej 8 muajsh.
Ajo tregoi për Corriere della Sera se tashmë ai ka një imunitet tepër të dobët dhe peshon 30 kilogramë më pak pas kalvarit të stërmundimshëm që kaloi nga marsi deri më tani. “Sot ai nuk është më ai që ishte. Ai është kockë e lëkurë, tridhjetë kilogramë më i lehtë”, tha ajo.
Anna shoqëroi djalin e saj në Tiranë pasi donte të zëvendësonte të gjithë dhëmbët e të dy harqeve me një kursim prej 50% krahasuar me të njëjtin operacion në Itali.
“Pak para operacionit ai kishte dërguar disa nga projektet e tij grafike në kompanitë kombëtare diskografike dhe ishte thirrur për intervistë nga stafi i një këngëtari të njohur. Për t’u përgatitur për takimin, ai kishte humbur peshë, kishte riparuar garderobën dhe donte dhëmbë të përsosur, sepse kishte humbur dy prej tyre”, tregon ajo.
Nëna i ishte nënshtruar një operacioni të ngjashëm disa vite më parë, po në Shqipëri.
“Kur isha atje, kisha parë disa njerëz që nuk ishin mirë pas trajtimit: pashë se kishin rënie të presionit të gjakut dhe sëmundje pa asnjë ndihmë postoperative”, tha ajo. Për këtë arsye ajo kishte kundërshtuar udhëtimin e djalit të saj, por Simone nuk e kishte dëgjuar.
“Para operacionit hëngrëm një picë, sepse askush nuk na tha se duhej bërë me stomakun bosh. Sapo mbërritëm, paguam gjysmën e shumës, 5 mijë euro. Ai hyri në sallën e operacionit dhe unë prita jashtë”, kujton gruaja.
“Në mesin e mjekëve kishte një nervozizëm, aq sa njëri prej tyre doli i nervozuar nga dhoma, duke hedhur me dhunë dorezat e tij kirurgjikale në dysheme. Nuk pata guxim të afrohesha dhe prita që Simone të dilte”, tha ajo.
E ëma e Simones, 37-vjeçar, tregon se kur djali doli nga salla e operimit ai ishte shumë nervoz dhe kishte dhimbje.
“U kthyem në dhomën në të njëjtën klinikë, ai bëri një dush, veshi pizhamet dhe filloi të shikonte TV. Ai kishte etje dhe shkoi të merrte një shishe me ujë, ende brenda në klinikë, por nuk u kthye më. E gjeta të shtrirë në tokë, pa ndjenja, me një grup njerëzish rreth tij. Ai kishte pasur arrestin e parë kardiak”, thotë ajo në rrëfimin e saj.
“Menjëherë donin të më bënin të besoja se Simone tashmë kishte disa probleme me zemrën. Megjithatë, ai kishte qenë gjithmonë mirë. Asnjë test nuk e kishte theksuar këtë; një ditë më parë kishte ecur njëmbëdhjetë kate me çanta pazaresh. Nga ajo ditë Simone ishte në koma të shkaktuar nga mjekësia deri më 1 maj”, tha ajo..
Tani Simone ndodhet në spitalin Casa Sollievo della Sofferenza në San Giovanni Rotondo në Foggia, duke pritur për një operacion të ri për një stenozë trakeale.
Për t’u kujdesur për djalin e saj, nëna ka marrë me qira një dhomë me 500 euro në muaj: “Na thonë se janë kriza epileptike ose kriza neurovegjetative dhe se duhet të gjejnë kurën dhe terapinë e duhur”, shpjegon ajo.
