Isa Myzyraj, kryetar i Asociacionit te gazetarëve shqiptarë tha në një intervistë për Euronews Albania se do të çojnë në Gjykatë Kushtetuese vendimin e qeverisë shqiptare për të mbyllur për 1 vit rrjetin social TikTok.
“Dhuna gjendet në të gjitha rrjetet sociale, kufizimi i kësaj vetëm me TikTok… Shoqëria shqiptare vuan nga dhuna online, nuk duhet të ndjekin rrugën më të shkurtër duke i mbyllur, të merren masa kufizuese. Kemi shembullin e Australisë, që e ka kufizuar për fëmijët nën 16 vjeç, pse ne duhet të shkojmë tek shembulli i Turqisë dhe Kinës? Qeveria ka të gjitha mekanizmat për të negociuar, gjëja është thellësisht politike… Rrjetet sociale janë hapësirë thelbësore e lirisë së shprehjes dhe në këtë aspekt ne do të bëjmë çdo përpjekje të mundshme që sapo ky vendim i papërgjegjshëm të kthehet në një vendim juridik, do përdorim mjetet ligjore për ta sfiduar në Gjykatën Kushtetuese”, tha ai.
Kryeministri i Shqipërisë Edi Rama tha të shtunën se qeveria do të mbyllë shërbimin video TikTok për një vit, duke e fajësuar atë për nxitje të dhunës dhe bullizmit, veçanërisht midis fëmijëve.
Autoritetet shqiptare zhvilluan 1300 takime me mësues dhe prindër pas vrasjes me thikë të një adoleshenti në mes të nëntorit nga një adoleshent tjetër pas një sherri që filloi në TikTok.
