Në emisionin "Alert" në Ora News, të moderuar nga Granit Sokolaj, u bë një apel i fortë lidhur me përdorimin e një ilaçi të miratuar nga Bashkimi Evropian dhe Shtetet e Bashkuara dy vjet më parë, që ka tërhequr shumë vëmendje kohët e fundit për trajtimin e diabetikëve dhe individëve me obezitet.
Ilir Lloha, Zëvendësdekan i Fakultetit të Bioteknologjisë dhe Ushqimit, shpjegoi se ky ilaç është i përshtatshëm vetëm për ata që kanë diabet dhe janë të obezë, dhe jo për të gjithë, pasi mund të shkaktojë varësi dhe pasoja të tjera të rënda shëndetësore.
Lloha theksoi se përdorimi i ilaçit nga individë që nuk janë diabetikë mund të çojë në probleme serioze, si humbje të shpejtë të peshës, që mund të arrijë deri në 30 kg brenda një periudhe të shkurtër.
Ai sqaroi gjithashtu se ilaçi ka efektin e frenimit të urisë dhe është i sigurt vetëm për pacientët me diabet dhe obezitet, duke e bërë të rëndësishëm përdorimin e tij vetëm nën mbikëqyrjen e mjekëve.
"Ky ilaç është i efektshëm për ata që kanë nevojë për trajtim, por përdorimi pa rekomandimin e mjekut mund të ketë pasoja të rënda," u shpreh Lloha.
