Pa energji elektrike kanë mbetur për disa orë qytetet e Durrësit, Fierit, Lushnjes dhe Vlorës.
Korrespondentët e Top Channel bëjnë me dije se këto qytete janë në errësirë totale, ndërsa në Vlorë nuk punon as interneti i kompanive telefonike në celularët e qytetarëve.
Sipas Operatorit të Sistemit të transmetimit në orën 17:37 si pasojë e një defekti në linjat e transmetimit 220 KV kanë ngelur pa energji elektrike Rajonet Vlorë, Durrës, Berat ,Fier.
Nëpërmjet linjave alternative u është dhënë tension Nën-stacioneve të këtyre rajoneve dhe po punohet për rikthimin e energjisë në të gjithë abonentët.
Energjia po kthehet pjesë-pjesë, sipas një plani të diktuar nga qendra në Tiranë.
