Policia në Tiranë ka arrestuar 41-vjeçaren I.Ç, pasi gjykata në Berat ka vendosur për të masën “arrest me burg” për “shkelje të rregullave të mbrojtjes në punë”.
Mësohet se e arrestuara ishte drejtuese e firmës, ku humbi jetën në dhjetor 2024 një punonjës. Ky i fundit humbi jetën, pasi e zunë poshtë gurët e kalasë.
“Në vijim të kontrolleve, me qëllim lokalizimin dhe kapjen e shtetasve të shpallur në kërkim, Komisariati i Policisë Berat, në bashkëpunim me Policinë Rrugore të Tiranës, ndaloi shtetasen I. Ç., 41 vjeçe, banuese në Tiranë, pasi më datë 27.12.2024, Gjykata e Beratit i ka caktuar masën e sigurisë “Arrest në burg”, për veprën penale “Shkelja e rregullave të mbrojtjes në punë”.
Më datë 17.12.2024, gjatë punës për rikonstruktimin e një objekti në lagjen “13 Shtatori”, humbi jetën shtetasin G. S., 47 vjeç, të cilin dyshohet se si pasojë e shkeljes së rregullave të mbrojtjes në punë, nga firma e ndërtimit në të cilën ishte drejtuese teknike shtetasja e ndaluar, e zuri poshtë një masiv guri që u shkëput nga zona e kalasë.
Pas ngjarjes u arrestua investitorja për rikonstruksionin e objektit dhe u shpall në kërkim administratori i firmës së ndërtimit, për të cilin vijojnë kërkimet, me qëllim kapjen.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme”, njofton policia.
