Kryetari i Partisë Bashkimi për të Drejtat e Njeriut Vangjel Dule, në një deklaratë për mediat tha se shtetasit shqiptarë në diasporë duhet të votojnë edhe me dokumente përtej datë së skadimit. Dule tha se i bën thirrje KQZ-së që t’i bëjë presion qeverisë që të merret në mënyrë imediate vendimi çdo të ndodhë me dokumentet e identifikimit përtej datës së skadencës.
Dule iu bëri thirrje minoritarëve që jetojnë në Greqi, që të regjistrohen për të votuar në zgjedhjet e 11 majit, me qëllim që të zgjidhen problemet që ata kanë. Ai tha se çdo shtetas shqiptar kudo jeton duhet të mendojë të votojë ndryshimin.
Vangjel Dule: Ka pasiguri në votën e emigrantëve. Qeveria ka ndikim të institucionet që rinovojnë dokumentet e identifikimit, lë shijen se mund të krijohen hapësira për trajtim selektiv të qytetarëve në diasporë. I bëj thirrje KQZ të ushtrojë presion në qeveri që të merret në mënyrë imediate vendimi çdo të ndodhë me dokumentet e identifikimit përtej datës së skadencës. Pjesëmarrja në zgjedhje më 11 maj mund të kryhet me dokumente që janë përtej datës së skadimit. Duhet të kemi të qartë se kush do administrojë votën e emigrantëve. Duhet të aplikohet e njëjta praktikë, siç ndodh me qendrat e votimit në mënyrë fizike. PBDNJ do të bëjë aktivitete në diasporë, në harmoni me forcat e tjera politike të koalicionit opozitar drejtuar nga PD.
Do bëja thirrje që minoriteti grek në Shqipëri që jeton në Greqi të regjistrohet, për të adresuar problemet e tyre, që kanë të bëjnë me pronat e tyre. Emigrantët shqiptarë në Greqi, nga cilido qark i Republikës të jenë, të bashkohen, që problemet e tyre të mund t’i trajtojmë. Të gjithë emigrantët kudo jetojnë të shkundin votën për ndryshimin, është momenti i tyre.
