Emigrantët në qendrën e Gjadrit në Shqipëri do të kthehen në Itali, pas vendimit të Gjykatës së Apelit të Romës të premten.
Gjyqtarët pezulluan paraburgimin e 43 shtetasve bangladeshas dhe egjiptianë të dërguar në Gjadër, duke shtyrë vendimin e radhës të Gjykatës Evropiane të Drejtësisë për vende të sigurta.
Efekti i këtij vendimi është se azilkërkuesit do të kthehen në Itali dhe do të lirohen.
Kthimi është planifikuar për mbrëmjen e sotme, më 1 shkurt, dhe do të bëhet me anijet e rojes bregdetare.
“Ka habi të madhe, sepse për mendimin tonë nuk ka nevojë të presim vendimin e Gjykatës Evropiane të Drejtësisë”, thanë burime qeveritare për ANSA, duke komentuar mosvleftësimin e ndalimit të emigrantëve që ishin dërguar në Shqipëri.
Në qendrën e Gjadrit, nga 49 emigrantët që mbërritën të martën, 43 qëndruan aty, pasi gjashtë prej tyre u transferuan sërish në Itali për shkak se ishin të mitur ose vulnerabël dhe për rrjedhojë nuk kishin të drejtë për procedurën e përshpejtuar të azilkërkimit.
