Banorët që jetojnë në zona rurale vijojnë të jenë të stepur ndaj proceseve bujqësore. Banorët nuk e marrin më mundimin të punojnë tokën për shkak të çmimeve të larta të të gjitha proceseve si dhe të plehrave kimike.
Sami Çipi, banor i fshatit Fullqet në Bashkinë Klos thotë se bujqësia nuk e ka marrë mbështetjen e nevojshme që të motivojë banorët e mbi të gjitha të rinjtë të merren me të.
Sipas tij, çmimet e larta të proceseve të punimet të tokës, të farërave apo dhe plehrave kimike kanë bërë që sipërfaqja e tokës së mbetur djerr të shtohet çdo vit e më shumë. Samiu tregon se ky fshat ka toka shumë prodhuese e këtë e ka treguar para viteve 90-të.
Prodhimet që dilnin nga ky fshat furnizonin shumë fshatra të Matit me produkte të ndryshme. Sipas Sami Çipit rritja e të gjitha çmimeve të tjera ka bërë që edhe blegtorët të rrisin çmimin e mishit.
Një tjetër arsye që tokat kanë mbetur djerr është edhe largimi i të rinjve, por sipas banorëve edhe nëse do të ishin këtu nuk do ta punonin tokën për shkak të kostos së lartë.
