Ulen ndjeshëm kredite me probleme.Viti 2025 ka nisur me një tregues mjaft optimist i cili konfirmon qëndrueshmërinë ekonomike të vendit por njëkohësisht edhe aftësinë paguese të qytetarëve dhe biznesve.
Huatë me probleme kanë zbritur në 4.12% niveli më i ulët i regjistruar që prej 2014 një tregues ky që këstet e kredive janë paguar në kohë si nga bizneset po ashtu edhe nga qytetarët. Nëse bëjmë një vlerësim vjetor, norma e kredive me probleme ka rënë me 0.76 pikë përqindje, duke reflektuar përmirësim të mëtejshëm të cilësisë së huadhënies. Për të stabilizuar inflacionin Banka e Shqipërisë ka rritur disa herë normën bazë të interesit ndërsa aktualisht ka nisur politikën lehtësuese duke e çuar atë në 2.75%.
Rritja e normave të interesit jep ndikim direkt në shtrenjtimin e kësteve të kredive për qytetarët apo për bizneset .Por mesa duket deri më tani efekti ka qenë i pandjeshëm në përkeqësimin e bilanceve të kredive dhe ulja e normave të interit duket se ka dhënë efektet e para në vijimin e uljes së huave me probleme në vend.
Ulja për disa muaj me radhë e nivelit të kredive të këqia është një tregues pozitiv për ekonominë si në aspektin e sistemit bankar por edhe për qytetarët si dhe është një tregues se sektori bankar në vend është i shëndetshëm, por gjithashtu reflekton përmirësimin e aftësisë paguese të individëve dhe bizneseve për të përmbushur detyrimet e tyre ndaj kredive të marra nga institucionet financiare.
Huaja e re e aprovuar për ekonominë është ngadalësuar në fillim të këtij viti. Janë rreth 16 miliard lekë më pak kredi të dhënë nga bankat e nivelit të dytë në janar. Banka e Shqipërisë ka publikuar statistikat që tregojnë se në janar të vitit 2025 huaja e re ishte në vlerën 31.9 mld lekë ose 15.9 miliardë më pak nëse e krahasojmë me dhjetorin e vitit të kaluar.
Megjithatë nëse shohim huadhënien e bankave për të njëjtën periudhë të vitit të kaluar rezulton se mbetet më e lartë.
