Në seancën e sotme plenare në Kuvendin e Shqipërisë, është mbajtur një minutë heshtje në nder të ish-deputetit socialist, Andis Harasani, i cili u nda nga jeta një ditë më parë.
Të dyja krahët politike, nderuan ish-deputetin socialist.
Kreu i PD-së Sali Berisha, pasi u mbajt një minutë heshtje për ndarjen nga jeta të ish-deputetit të PS-së Andi Harasani, iu drejtua socialistëve duke u thënë se duhet të kërkojnë ndjesë se e larguan nga partia.
Berisha tha se Harasani ishte një patriot, një njeri i cili nuk pranoi kurrë të bëjë kompromis me të keqen.
“Mendoj se, aktet e nderimit duhet të jenë të plota dhe të sinqerta.
Andis Harasani i përkiste një plejade politikanësh të rinj. E vërteta, i shkolluar mirë, i kyçur në proceset demokratike që në fillim.
Por nuk mund të mohohet se, ju e përzutë atë, dhe duhet të kërkoni ndjesë. Jo ju personalisht, se nuk e përzutë ju personalisht, por rilindja e përzuri atë.
E kam nderuar me bindje të plotë për atë që thashë, sepse një politikan që rininë ja kushtoi ndryshimit të Shqipërisë, për ato ideale, por e kam nderuar se mbeti socialist besnik i atyre parimeve që besonte gjer ditën e fundit.
Një patriot, një njeri i cili nuk pranoi kurrë të bëjë kompromis me të keqen, siç bëtë ju, me radhë.
Prandaj mund ti kërkonit ndjesë dhe ju garantoj se veç se përfaqësoje jo mendimin e Sali Berishës, por mendimin e qindra dhe mijëra socialistëve që e prisnin sot këtë nga ju”, tha Berisha.
