Ekipi Kombëtar i Shqipërisë U-20 ka nisur ditën e sotme grumbullimin dhe stërvitjet intensive në prag të dy ndeshjeve miqësore që Kombëtarja do të zhvillojë kundër Malit të Zi.
Kuqezinjtë do të zhvillojnë ndeshjen e parë më 12 qershor në Mal të Zi ndërsa tre ditë më vonë do të kthehen të luajnë në stadiumin “Loro Boriçi” në Shkodër.
Trajneri i përfaqësueses shqiptare, Ilias Haxhiraj ka bërë publike listën me 23 lojtarë të grumbulluar për këto dy sfida, të cilët aktivizohen në kampionate brenda dhe jashtë vendit.
Ky grumbullim pesë ditor dhe këto dy ndeshje miqësore do t’i shërbejnë drejtuesit të kuqezinjve për të parë më nga afër gjendjen e lojtarëve si dhe për të vëzhguar futbollistët e rinj që vijnë për herë të parë në këtë grumbullim.
Trajneri Haxhiraj ka pasur mundësi të shikojë elementët e Kombëtares në disa seleksionime të zhvilluara përgjatë këtij viti, ku për shkak të kufizimeve nga pandemia Covid-19, ka qenë e pamundur për teknikun kuqezi të shohë ekipin e plotë, së bashku me lojtarët që aktivizohen jashtë vendit.
