Vonesa në shlyerjen financiare të peshëngritësit Briken Calja për medaljet e marra në Kampionatin Botëror ka qenë një temë shumë e nxehtë gjatë ditëve të fundit.
Pas denoncimit nga “Panorama Sport” se sportisti nuk i kishte marrë paratë që i takojnë sipas ligjit, erdhi fillimisht reagimi i ministres Evis Kushi, e cila njoftoi se Ministria e Arsimit dhe Sportit i kishte bërë procedurat, duke ia kaluar sportistit paratë nëpërmjet federatës, ndërsa i bëri apel kësaj të fundit që t’i mbyllte të gjitha detyrimet. Më tej u prononcua edhe Elez Gjoza, i cili u shpreh për gazetën se vonesat kishin ardhur për shkak të ngarkesës me aktivitete të shumta për FSHP-në dhe procedurave për dokumentacionin.
Kreu i shtangës bëri të ditur se të martën (dje) do të vinte edhe mbyllja përfundimtare e likuidimit nga ana e federatës në drejtim të sportistit. Gazeta ka kontaktuar sërish me Gjozën, i cili konfirmoi se dje federata ka përfunduar çdo procedurë ligjore për sa i përket shpërblimit të Caljes. Këtë gjë e pohoi edhe vetë shtangisti, i cili gjithashtu konfirmoi se është njoftuar nga federata për zgjidhjen e kësaj çështjeje.
Kujtojmë se Briken Calja në dhjetor të vitit të kaluar shkroi historinë e sportit shqiptar, duke fituar titullin kampion bote në stilin e shkëputjes, ndërsa u shpall nënkampion në shtytje dhe dygarësh në Botërorin e zhvilluar në Uzbekistan. Për këto rezultate, Caljes i takojnë 178 milionë lekë të vjetër.
Ndërsa trajneri i tij, Gerald Toska, sipas ligjit, përfiton 40% të kësaj shume, pra 71 milionë e 200 mijë lekë të vjetër. Kujtojmë se disa muaj më parë, qeveria mori një vendim shumë të rëndësishëm për peshëngritjen, duke e shpërblyer atë sipas rregulloreve ndërkombëtare, pra në çdo stil dhe jo më vetëm në dygarësh siç ka qenë në të shkuarën.
