Edmond Zaja triumfon në disiplinën 10-gurë!
Federata Shqiptare e Bilardos dhe e Snookerit ka mbyllur një tjetër aktivitet të rëndësishëm të sezonit, teksa më datat 25-26 maj në Tiranë është mbajtur kampionati kombëtar në disiplinën 10-gurë.
E veçanta e këtij kampionati ishte se çerekfinalistët përfaqësonin klube të ndryshme të Shqipërisë, duke vijuar me Edmond dhe Mario Zaja, bilardistë të Laçit. Marjan Nikolli dhe Ermal Laska nga ekipi i Butrintit. Astrit Tolaj nga Flamurtari, Preng Gjokmarkaj bilardist i Mirditës, Besar Spahiu i Tiranës dhe Dritar Bajrami nga Struga, bilardist i Pogradecit.
Duke kaluar te faza e nxehtë e sfidave, në gjysmëfinale u përballën Preng Gjokmarkaj (Mirdita) kundër Astrit Tolajt (Flamurtari) dhe Edmond Zaja (Laçi) ndaj Dritar Bajramit (Pogradeci). Ndeshje të një niveli të lartë, ndërsa në finale u kualifikuan Astrit Tolaj dhe Edmond Zaja. Triumfi final shkoi për Edmond Zajën, një stekë e vjetër, 8 herë kampion kombëtar dhe 4 herë fitues i Kupës së Shqipërisë. Në fund u mbajt edhe ceremonia e eventin, me Zajën që u kurorëzua kampion i disiplinës 10-gurë për vitin 2024.
