Lojërat Olimpik po mbahen në Paris!
Atmosferë madhështore!
Kosova po përfaqësohet me 9 sportistë por të gjithë sytë i kanë nga xhudo, ku pritet të fitojnë medalje olimpike.
Sportisti më i mirë shqiptar i të gjitha kohërave, ish mundësi i mirënjohur Shaban Tërstena, kampion olimpik në vitin 1984 dhe nënkampion olimpik në vitin 1988, tha se ishte një ngjarje e veçantë hapja e Lojërave Olimpike – “Paris 2024”.
“Kryeqyteti francez Paris, pas saktësisht 100 vitesh më parë, organizon për të tretën herë Lojërat Olimpike dhe mbrëmë bëri një surprizë në ceremoninë zyrtare të hapjes së Lojërave Olimpike XXXIII.
Ishte për herë të parë në historinë e sportit, ishte një ngjarje e veçantë për Lojërat Olimpike të vitit 2024 e cila u ndoq nga gati 2 miliardë njerëz, një hapje moderne shumë interesante në 4.5 orë, për herë të parë jashtë stadiumit olimpik.
Të dashur miq, si sportist kam marrë pjesë 3 herë në Lojërat Olimpike. Më duhet t'ju them mendimin tim për hapjen e lojërave olimpike në stadiume, është një atmosferë fantastike, shumë më argëtuese, gëzim i madh dhe adrenalinë e paparë në shpirtin e sportistit ku 100 mijë spektatorë në stadium ngrihen për të pritur dhe përshëndes sportistët nga i gjithë bota.
Po ashtu dita e djeshme ishte e bukur, hapja moderne e Lojërave Olimpike të Parisit, tani 10.700 sportistëve u uroj fat dhe suksese dhe sidomos sportistëve tanë të bëjnë maksimumin për të fituar ndonjë renditje të mirë, natyrisht edhe për vajza Pejane që ta përsëritin suksesin e artë olimpikë nga Tokio në Paris 2024”, ka shkruar Tërstena në profilin e tij në facebook.
